Mat 14 | KYG | STEP | Ani afina'mo Heloti'a Galeliya kote'mo yagaino ne'apateya gamani vekamo'a Yesufe'mo ava gemo hu'nageno afi'niye.

Matthew 14

Yoni'a ani faleno ne'apateya vekamo fali'niya gemae

(Mak 6:14-29; Luk 3:19-20; 9:7-9)

1 Ani afina'mo Heloti'a Galeliya kote'mo yagaino ne'apateya gamani vekamo'a Yesufe'mo ava gemo hu'nageno afi'niye. 2 Afiteno'ae'mo ali'ya'amo ne'aliya vaya'aife'mo hapa paino'ae'mo, Agaemo Yoni'a ani faleno ne'apateya vekamo mai'niye. Ago amagi'nogeno fali'nige'a ki'a ate'nayateti'mo halate he ti'niya'mofe'mo lusi himamu'aleti'mo ani ali'ya'mo ne'aliye, huno hapa pai'niye.

3 Hogoteno Heloti'a ina kava'mo hu'niye. Agaemo agana'amo Filipi a'mo Helotiyasi'mo ali'nigeno Yoni'a ha paino'ae'mo, a ali'nana kava'mo ke'aepa gemo amagika atale'nane, huno ha pai'niya'mofe'mo Heloti'a atafauno nofi kino ateteno kalavusi huno ate'niye. 5 Heloti'a Yoni'mo kamiti amagisiyafe'mo hu'niya'monanafa Yu vaya'mogimo hu'apae'mo, Gotitegati gemo alinineno aeno hakalo huno hapa nepaiya vekamo mai'niye, hu'a apakesa afi'naya'mofe'mo vaya'aife'mo koli huteno afa'a ate'niye. 6 Heloti'a ita'amo'mo alino ate'niya afina'mo halate afole ai'nigeno ne'ya'mo yagita hu'nige'a e'a ne'ya'mo ne'nageno Helotiyasi a'mafa'nemo'mo muki vaya'ai apaulagale'mo oae'nigeno Heloti'a lusi kava huno amuse huno ate'niye. 7 Agaefe'mo polomasi gemo ha paino'ae'mo, kahau'nisiya yafe'mo naha paiyo, afa'a kamiguve, huno huteno ago'ya ataleteno ha pai'niye. 8 Ita'amo'mo a'mafa'ne'ae'mo ha pai'niya gemo ha paino'ae'mo, Yoni'a ani faleno ne'apateya vekamo lugo'amo heka hatagauka agenopa'amo alika yuvapafi'mo malelikeka namiyo, huno ha pai'nigeno 9 yagaino ne'apateya kini ne'mo'a ani gee'mo hau hu'niye. Hau hu'niya'monanafa muki vaya'ai apaulagale'mo a'mafa'ne'ae'mo ago'ya ataleteno ha pai'niya'mofe'mo ati vekae'mo, 10 uka lugo'amo heka hatagauka agenopa'amo alinikeka amiyo, huno ha pai'nigeno ati vekamo'a uno lugo'amo heno hatagau'niye. 11 Agenopa'amo alino yuvapafi'mo maleteno alinineno ani a'mafa'nemo ami'nigeno alininuno ita'amo'mo ami'niye. 12 Yoni ge'amo ne'afiya vaya'mogimo e'a kefa'amo alini u'a ki'a atete'a u'a Yesufe'mo ha pai'nae.

Yesu'a faefu tauseni'a vaya'mo ne'ya'mo apami'niya gemae

(Mak 6:31-44; Luk 9:10-17; Yon 6:1-13)

13 Yesu'a ani gemo afiteno'ae'mo agai'age'mo maisiyafe'mo sipifi'mo u'a ka'me kotegamo mai'nae. Ani'mo lakaeno u'niye, hu'a hu'nage'a afite'apae'mo lusi asole vaya'mo taoni'afati taoni'afati'mo e'a akame hu'a visayafe'mo ani agi'nale'mo u'nae. 14 Yesu'a ani agi'nale'mo eno ava'yi huteno'ae'mo sipifati'mo lamino apakeyana asole vaya'mo e'a mai'nageno apaketeno'ae'mo lusi kava huno hau huno apateteno kaita hapau'niya vaya'mo alino hapageno apate'niye. 15 Yegemo lamino falegefe hu'nige'apae'mo ge'amo ne'afiya vaya'mo agaetegamo e'apae'mo, mani kote'mo ka'me kotega mai'nona'mofe'mo hani hugefe hiyanagi muki vaya'mo alika apatege'apao taoni'apifati taoni'apifati'mo u'a ne'ya'apimo miya faiyo, hu'a ha pai'nageno 16 Yesu'a, visaya ka'mo ohane'niye. Ne'ya'mo mani vaya'mo apamiyo, huno hapa pai'nige'apae'mo, 17 faefu'a peleti maya'e lole noyamela'e'mo ali'none, hu'a ha pai'nae.

18 Yesu'a, alinitetapa namiyo, huno hapa paiteno'ae'mo 19 muki vaya'aife'mo kahaule'mo itopale maiyo, huno hapa paiteno faefu'a peleti maya'e lole noyamela'e'mo ali'neno maku huno koku'napi age'neno hao ke heteno peleti mayamo alino akaya heno ge'amo ne'afiya vaya'mo apami'nige'a muki vaya'mo ali'a apami'nae. 20 Muki vaya'amogimo ne'a apamu hute'apae'mo atalaya ne'ya atupa'amo ge'amo ne'afiya vaya'mogimo ali'a tuolofu'a hona yuvapafi'mo male'nae. 21 Ani ne'ya ne'naya vaya'mo faefu tauseni'a agufa vemogi ne'nae. Na magi a'ne mafa'nemogi'e'mo ne'nafi hu'a lekana opai'nae.

Yesu'a ani agotofule'mo e'niya gemae

(Mak 6:45-52; Yon 6:16-21)

22 Yesu'a muki vaya'mo ne'ya'mo ago apami'nige'a netageno'ae'mo Yesu'a ge'amo ne'afiya vaya'aife'mo hapa paino'ae'mo, sipifi'mo ago utapa hogo'neteyo, huno hapa paiteno muki vaya'aife'mo, notapilegamo he titapa viyo, huno hapa pai'niye. 23 Hapa paiteno'ae'mo nunumu hisiyafe'mo agai'age'mo aise avefi'mo haino mai'niye. Hani hugefe'mo unali enali hu'niya kanale'mo agai'age'mo mai'nigeno 24 sipimo ani kotu folagapi'mo afagi'ale'mo ne'vigeno'ae'mo sipimo augosa maleno ne'viya kategati'mo yasimo alinineno sipimo alino ago'ya fai'nigeno atafauno ate'niye.

25 Kotiti agufa afina'mo Yesu'a apakaetegamo ani agotofule'mo e'niye. 26 Ne'ege'apae'mo ge'amo ne'afiya vaya'mogi agayana ani agotofule'mo ne'ege'a agete'apae'mo alopa gefati'mo ge hu'apae'mo, afene, hu'a hute'a lusi kava hu'a apamo'ya aite'a kagekage hu'nae. 27 Yesu'a huno'ae'mo, nagaeke'mo ne'ogi koli osutapa lokiya vaitapa maiyo, huno hapa pai'niye. 28 Hapa pai'nigeno Pita'a, Ala kava nene, kagaemo ne'esana'mo'mo ge huge'nao ani agotofule'mo vino, huno hu'nigeno'ae'mo, eno, huno hu'niye. 29 Pita'a sipifati'mo ataleno ani agotofule'mo Yesutegamo ne'uno'ae'mo 30 lusi kava huno yasimo ali'nigeno koli huteno anipi'mo alino lapanegefe'mo nehuno'ae'mo, Ala kava nene, nagufamo alika katika nato, huno alopa gefati'mo ge hu'niye. 31 Yesu'a malage huno eno ayate'mo alino he tino ne'ateno'ae'mo, aise'amo kagesa afika fatago nehana vekagi na kava higekae'mo lole kagesa ne'afine, huno ha pai'niye.

32 Sipifi'mo nehai'ageno'ae'mo yasimo o'ali'nige'a sipifi'mo mai'naya vaya'mogimo ani kava'mo agete'a agaefe'mo mono hute'apae'mo, alagi Goti mafa'ne'amo mai'nane, hu'a ha pai'nae.

34 Magokepi lokaeli'a Genesaleti haopalega u'a ava'yi hu'nage'a 35 agete'apae'mo, Yesu'mae, hu'a hute'a muki haopalegamo ali'a apatalage'a u'a hapa pai'nage'a muki alu kaita alu kaita'mo hapau'niya vaya'mo Yesutegamo apavaleli'a e'nae. 36 Apakaemo, kahao ke hone, kukenakamo atupa'ale'mo ame alisunafeke'mo lahau'niye, hu'a hu'nageno'ae'mo, he, kanalene, huno huteno muki ame ali'naya vaya'mo alino hapageno apate'nige'a alagepa hu'a mai'nae.